مأساة زوجة: جوزى بيشتمنى بأهلى وبيقولى أنتى ولا حاجة من غيرى

بيقولى أنا اللى عملتك وعرفتك يعنى أية عيشة نضيفة .. بتلك الكلمات روت زوجة لتحيا مصر من داخل محكمة الأسرة عن زوجها ذو الطبع المتكبر والذى أعتاد معاملتها بإهانة وذل بسبب الفرق الكبير بين أسرته وأسرتها فى الوضع المادى مما جعل الزوجة تقرر الأنفصال عنه حفاظاً على كرامتها وترفع عليه دعوى خلع بمحكمة الأسرة ".

طلعت مش نضيفة ومبتعرفش تطبخ.. مأساة زوج: إتجوزتها عشان تنسينى مراتى الأولى

قابيل وهابيل في شبرا.. شاب يقتل شقيقه ويبكي كالأطفال بجواره

جوزى وأهله مستواهم عالى وأنا يتيمة الأب والأم 

بدأت الزوجة حديثها لتحيا مصر :" أنا وجوزى متجوزين من سنيتن ولسة ربنا مرزقناش بأطفال أنا يتيمة الأب والأم وعايشة مع خالتى وجوز خالتى جوزى مهندس مدنى وأسرته مرتاحين مادياً وأتعرفنا على بعض وأنا واقفة بساعد جوز خالتى فى بيع الخضار والفاكهة اللى أحنا بنسترزق بيهم هو أعجب بيا أول ما شافنى عشان بالرغم من بساطة الظروف اللى عايشة فيها مهتمة بشكلى وبنضافتى بأسلوبى وبمستوايا الدراسى كمان فى المعهد اللى بدرس فيه وأنا طبعاً زى اي بنت لما لقيت شخص محترم ومستواه كويس معجب بيا وبيسأل عليا فى المنطقة وعلى عيلتى عملت تقيلة ومش مهتمة وده وقعه فى حبى أكتر لحد ما جه طلب أيدى من جوز خالتى وووقف قدام أهله عشان يرضوا بيا وفى الآخر اتجوزنا ".

بيشتمنى بأهلى وبيعايرنى طول الوقت 

وتابعت الزوجة في كلماتها:" بعد الجواز كل حاجة أتغيرت والراجل اللى كنت معجبة بيه وفكراه شارينى بقى شخص تانى معايا وأهله قدروا يسيطروا عليه ويقلبوه عليا وعلى أبسط غلطة ليا كان  بيعايرنى ويشتمنى بأهلى ويقولى كلام يجرحنى لو مثلاً اتأخرت عليه فى الغدا او أشتكيتله من المعاملة الوحشة اللى بشوفها من أهله كنت الاقيه يشتمنى أفظع الشتايم ويقولى " أنتى هتعملى نفسك بنى آدمة ده أنا نضفتك وعرفتك يعنى أية عيشة ده أنتى ولا حاجة من غيرى يا بنت كذا وبنت كذا " .

رفعت عليه دعوى خلع عشان أحفظ كرامتى 

وأختتمت الزوجة الحديث:" فضلت فترة بحاول أستحمل كلام وإهانة جوزى ليا بس لما لقيته فى كل مرة بيقولى فيها كدة مبيعتذرش ولا حتى بيحس بغلطه بقيت حاسة أنه بيستغل أنى يتيمة ومليش أب ولا أم يردوا عليه وفعلاً كان بيقولهالى لما كنت بقوله أنا هسيبلك البيت وأمشى فى اي خناقة بيننا كان يقولى " على أساس أن ليكى حد تروحيله ده حتى خالتك وجوز خالتك ما صدقوا جوزوكى عشان يخلصوا منك " بس أنا حسبتها مع نفسى وقررت مفضلش عايشة تحت رحمته وأشترى كرامتى اللى رماها فى الأرض وروحت أرفع عليه دعوى خلع عشان أعرفه أن محدش له فضل عليا غير ربنا وأنى كنت نعمة فى أيديه وعمرى ما قصرت معاه فى حاجة بس هو اللى معرفش يحافظ عليا وخسرنى ".