ندى موسى: قلقت من دوري في عملة نادرة.. كنت بحس جمال سليمان أبويا فعلًا.. والست مظلومة في السينما| حوار

ندى موسى.. فنانة لها طريقتها الخاصة في التمثيل وتجسيد الشخصيات، تنوعت في أدوارها، وشاركت في أنواع درامية مختلفة، أدائها التمثيلي طبيعي الخالي من أي تصنع كان هو بوابتها إلى دخول قلوب الجمهور والتأثير فيه، طلت علينا في الموسم الرمضاني 2023 من خلال عدة شخصيات في أعمال مختلفة، أبرزهم دورها في مسلسل عملة نادرة بطولة نيللي كريم.

أجرى موقع تحيا مصر معها حوارًا خاصًا لتكشف لنا عن تفاصيل مشاركتها في المسلسل، والصعوبات التي واجهتها أثناء التصوير، بالإضافة إلى الكثير من الأمور الأخرى، وإليكم نص الحوار:

في البداية.. كيف جاء ترشيحك لمسلسل عملة نادرة ؟

أستاذ ماندو العدل كلمي وأستاذ هاني عبد الله المنتج الفني أن هو عايزني في دور في مسلسل مع نيللي كريم، وأنا وماندو اشتغلنا مع بعض كذا مرة، في بداياتي كنت أول مرة أعمل دور كبير كان في الداعية وهو كان مؤمن بيا جدًا، وعلى مستوى الصداقة علاقتنا قوية جدًا، وبيعرف يحتويني لما ببقى متوترة، وفاهمني، وعمره ما دخل صداقتنا في الشغل.

كنت قلقانة من أني السنادي مش عايزة أعمل حاجة فيها مجهود بس لما قريت الورق وشوفت الناس وقعدت معاهم لقيت نفسي متحمسة للدور.

حدثينا عن وقوفك أمام النجمة نيللي كريم والفنان أحمد عيد

نيللي بالنسبالي اكتشاف على كل المستويات، على المستوى الإنساني ومستوى الشغل وموهبتها، وفاجئتني أنها بتعمل الصعيدي، وهي عاملة شخصية نادرة، ومن المكاسب الكبيرة اللي كسبتها في المسلسل دا أن أنا اتعرفت عليها، واستمتعت بالتجربة معاها.

وأحمد عيد كان مفاجأة بالنسبالي، أنا اشتغلت معاه كوميدي بس المجهود اللي عامله عشان الدور دا هيبقى مفاجأة للناس كلها ونقلة في حياته الفنية، وفي اللوكيشن بنسى أنه أحمد عيد وبتعامل معاه على أنه مسعود.

كيف كانت تجربتك مع الفنان جمال سليمان

في الأول كنت متأثرة بفكرة أن علاقتنا ببعض متوترة وكنت بسلم عليه وبحبه جدًا، وبعد كدا كنت بطلع عينه بس هو بيستحملني وعلاقتنا بقت لطيفة وبقيت حاسة فعلا أنه أبويا، وكنت بنكشه، وأستاذة فريدة سيف النصر والدتي في المسلسل عندها عفوية رهيبة، ومش بتغلب.

ما الذي تعلمتيه من المصحح اللغوي عبد النبي الهواري ؟

عبد النبي الهواري أضافلي كتير، وهو عنده ميزتين الأولى أنه بيفهم في الدراما والتانية أنه بيعرف يتعامل مع كل واحد على حسب دماغه، فاهم يعني ايه ممثل، وهو عارف أني بتوتر، وبقعد أسأله على الكلمة 18 مرة، ولما بيبقى موجود في اللوكيشن بهدى وبتطمن، وهو عمل معايا مجهود جبار.

ما الصعوبات التي واجهتك أثناء تحضيرك للشخصية والتصوير ؟

أنس من الشخصيات الواضحة ومفيهاش التعب والمجهود النفسي اللي كان موجود في شخصيات كتير عملتها، ودا مجهود عليا كممثلة لأني بحب ألعب.

هل تفضلين تقديم الشخصيات التي تقدم رسالة للمجتمع ؟ 

الهدف في الفن أنك تتفرجي على حاجة وتستمتعي دا كفاية، وطبعا الثوارات كلها قامت عن طريق الفن سواء رسم أو نحت أو أفلام، وطبعا أحب أقدم شخصيات ليها هدف بس أهم حاجة أوصل الشخصية بشكل صادق، أي شخصية هتتعمل هتتصدق حتى لو عندها مشاكل بتمر بيها هيبقى ليها رسالة لأن كل واحد بيشوف نفسه في شخصية معينة.

من وجهة نظرك.. هل أعمال المنصات أضافت للدراما ؟

أنا موضوع الـ 30 حلقة بالنسبالي موضوع قاتل، ودا عكس اللي بعمله كل سنة ولكن غصب عني، والمنصات فتحت مجال للناس الموهوبة، وعمر المنصات ما هتسحب البساط من تحت السينما.

هل ترين أن السينما تظلم العنصر النسائي في الأفلام ؟

مش قادرة أقول أوي لأني مشتغلتش سينما كتير، وأنا عايزة اشتغل سينما فمش عايزة أقول أنها بتظلم الست، احنا عندنا مشكلة واحدة على قد فهمي وعلى قد دماغي وهي أننا بنجري ورا الموضة أو ورا الحاجة اللي بتنجح، يعني أنا السنة اللي فاتت عملت دور في المشوار مغنية بعدها على طول جالي 4 حاجات كلهم رقاصة.. الناس بقت تستسهل، وعندنا نجمات شباك زي ياسمين عبد العزيز بس بقالها كتير مش بتعمل حاجة، واه الست مظلومة في السينما.

ما علاقتك بالسوشيال ميديا عند تعرضك للانتقادات ؟

مش بتفرق معايا الانتقادات اللي عايز يقول يقول، وأنت عايز تشتم اشتم.

هل تشاهدين نفسك في شاشة التلفزيون ؟

أنا مش هعرف اتفرج على عملة نادرة في رمضان عشان هتوتر جدًا، وأنا مش بعرف اتفرج على حاجة عملاها، وطول الوقت بنتقد نفسي، ومش عاجبني العجب، أنا راضية عن حياتي بس مش راضية على اللي أنا بعمله.

لو تمنيتي عمل شيء آخر غير التمثيل.. ماذا سيكون ؟

قبل كدا كان نفسي أرسم، ودلوقتي ممكن أطبخ، نفسي أروح أخذ كورس طبخ، وبخترع أكل حلووأكتر حاجة بعملها حلوة الباستا عشان أنا متعلماها في إيطاليا، نفسي يبقى عندي مطبخ على البحر.

هل توجد أعمال تحضرين لها بعد رمضان ؟

بشارك في فيلم كوميدي اسمه التجربة الأوروبية نازل في العيد وشخصيتي فيه اسمها قمرين، وإن شاء الله داخلة البحث عن علا الجزء الثاني، كان عندي فيلم مع أستاذ شريف عرفة وقف معرفش هيرجع ولا لا.