أمينة خليل: الهرشة السابعة مش للستات بس.. ومكنتش ببالغ في توتر نادين

أكدت الفنانة أمينة خليل أن مسلسل الهرشة السابعة ليس للسيدات فقط وإنما أظهر العمل وجهتي النظر، وذلك خلال لقائها اليوم ببرنامج يحدث في مصر مع الإعلامي شريف عامر.

تحيا مصر يرصد تفاصيل تصريحات أمينة خليل عن الهرشة السابعة

أمينة خليل: الهرشة السابعة مش للستات بس

وقالت أمينة خليل: أنا ومريم نعوم وكريم الشناوي من الأول خالص متفقين أن احنا عايزين المسلسل دا ميبقاش مسلسل ستات، بالعكس احنا كنا عايزين نظهر وجهتين النظر بتاعت الراجل والست.

وتابعت: أيا كان في علاقة آدم ونادين أو في علاقة سلمى وشريف، كنا عايزين يبقى فيه عدل بين وجهتين النظر تبان بحيث أنه المشاهد يبقى فاهم الصورة كاملة كان الشخصيات دي.

انفعالات أمينة خليل في مسلسل الهرشة السابعة

وفي الحلقة ذاتها، أكدت أمينة خليل أنها لم تبالغ في انفعالات شخصية نادين في العمل، وقالت: فيه ناس كتير من أصدقائي مخلفين، أختي عندها ولدين ربنا يخليهم لها فشوفت المعاناة دي قبل كدا، ومكنتش حاجة جديدة، وأكيد الأمومة بتبقى صعبة في الأول جدا.

واضافت: وأنا مبالغتش في توتر نادين، وحاولت بقدر الإمكان أني أقدم دور نادين بصدق وبحقيقة الموقف، وهي مضغوطة جدا وزعلانة وتعبانة وعندها أحلام ضاعت، فالواقع بتاعها ضاغط جدا عليها.

وعن تعاونها مع المخرج كريم الشناوي قالت: أنا بحب اشتغل مع كريم الشناوي أوي، وبثق فيه ثقة عمياء، وهو عنده طريقة مع الممثل، غير ناس كتيرة أوي، وبيحترم فكرة أن كل ممثل يبقى عنده اللغة بتاعته، ودي حاجة احنا بنحبها أوي وبنقدرها.

تامر حبيب يشيد بمسلسل الهرشة السابعة

وفي وقت سابق، كشف السيناريست تامر حبيب عن تأثره الشديد بعد أن شاهد الحلقة الأخيرة من مسلسل الهرشة السابعة، وذلك من خلال منشور عبر حسابه الشخصي على موقع التواصل الاجتماعي فيسبوك.

وقال: و بعد ما شفنا أول حلقة، وصاحبي مشي، و قعدنا شفنا آخر حلقة، وقعدت اعيط من نص آخر مشهد لغاية ما التيترات خلصت، كأني في صالة المسافرين في المطار بأودع ولادي اللي مسافرين لمجهول و انا بأدعيلهم بالسعادة و الرضا.

وتابع: وبافكر في رحلة السبع سنين و في دماغي صوت عبد الحليم بيغني : شوف خدتنا منين يا قلبي و شوف سابتنا فين…. باحبكم و كل ما هاتوحشوني هاتفرج عليكم تاني و تالت و عاشر يا حلوين يا ولاد الحلوين.