رفضت دور متحرش وأني أضرب وكنت شغال شيف.. أبرز تصريحات علاء زينهم

فجر الفنان علاء زينهم عدة تصريحات خلال حلوله ضيفًا على الإعلامي عمرو الليثي في برنامجه واحد من الناس، المذاع عبر شاشة قناة الحياة.

ويرصدها تحيا مصر خلال السطور التالية:

أبرز تصريحات علاء زينهم

• لما رجعت من العراق كنت بشتغل فى شركة تأمين فى وسط البلد، وكان معايا تاكسي إسود بعداد اشتغل عليه قبل وبعد الشغل، حتى استطيع أن أكون نفسي واتجوز.

• كنت بشتغل شيف في مطعم والمخرج عاطف سالم بيصور فيلم قاهر الظلام عن قصة طه حسين، وصاحب المطعم قاله إني بمثل في مراكز الشباب وقصور الثقافة وقاله هيعمل دور معايا قريب وفعلا بعتلي.

علاء زينهم في واحد من الناس

• قولت لصديقي يا سلام ربنا يكرمنا ونشتغل مع الأستاذ عادل إمام، وبالفعل لاقيت واحد صاحبى بيقولي تعالى بكرة تعمل مقابلة مع الأستاذ عادل إمام علشان تشتغل معاه في مسرحية الزعيم.

• كنت بعمل مسرحية العسكري الأخضر وكان هناك مشهد المفروض سيد زيان بيضربني فيه بالقلم وأنا رفضت، وقولتله لو ضربتني هاضربك وبعدها رفضوا استمراري.

• كان نفسي أشتغل مع أحمد زكي لكن ربنا عوضني واشتغلت مع ابنه هيثم.

• رفضت دور متحرش مع المخرجة إيناس الدغيدي، ولما اتناقشت مع أولادي قالوا لي يا بابا أوعى تعمل الدور ده الناس بتقابلك في الشارع هتقولك إيه؟.

• نفسي اشتغل مع ياسر جلال لأني اشتغلت معاه في مسلسل يتربى في عزو وكنت واخد عنه فكرة إنه رخم ومش جدع، لكني لاقيته غير كده وإني كنت ظالمه، وقولت ليه أنا كنت ظالمك.

• أستاذ صلاح السقا صاحب فضل عليا وهو اللي كان سبب إني أخد عضوية النقابة، وكانوا رافضين لأني شغال موظف.

• أخدت جائزة واحدة في حياتي عن فيلم الماء والخضرة والوجه الحسن، وكان الدور ده هيعمله الأستاذ صلاح عبد الله لكنه كان مريضا، واستأذنته قبل ما أعمل الدور.

علاقة علاء زينهم بالزعيم

• قابلت الزعيم عادل إمام، وقعد يهزر معايا وطبطب على كتفى، وكنت بخرج على النص معاه وكان بيضحك ويثبت الإفيه فى المسرحية.

• كان في مشهد المفروض البنطلون بيقع ولكنه موقعش ولقيت الجمهور بيضحك فطلب مني الزعيم ان اقدم المشهد دا يوميا بنفس الطريقة.

وجدير بالذكر، أنه شارك الفنان علاء زينهم في السباق الرمضاني الماضي، بمسلسل "جت سليمة" وهو من بطولة كلا من دنيا سمير غانم، ويضم مجموعة كبيرة من نجوم الدراما المصرية، محمد سلام، وهالة فاخر، وخالد الصاوي، وسامي مغاوري ومن إخراج إسلام خيري، وتدور أحداث مسلسل جت سليمة في إطار كوميدي فانتازي، حول «سليمة» التي تقرأ كتابًا من كتب الأساطير لأخيها وفجأة يجدوا انفسهم أصبحوا داخل الكتاب ويتنقلون عبر عصوره المختلفة، وفي كل عصر تقدم قصة أسطورية تعيش خلالها مغامرات مشوقة.