تامر هجرس: بحاول أكون أحسن وعايز ابقى دايمًا مكتفي وقريب من ربنا.. وكل حاجة نفسي فيها عندي

كشف الفنان تامر هجرس عن روتينه وأسلوب حياته في شهر رمضان الكريم، مشيرًا إلى الصفات التي يتمنى أن تكون فيه، وذلك خلال لقاء له ببرنامج أسرار النجوم مع الإعلامية إنجي علي عبر محطة راديو نجوم إف إم.

تحيا مصر يرصد تفاصيل تصريحات تامر هجرس في برنامج أسرار النجوم عبر نجوم إف إم

تامر هجرس: كل حاجة نفسي فيها عندي

وقال تامر هجرس: رمضان بالنسبة ليا عبادة ورياضة ومقابلة أصدقائي، وبالنسبة ليا القرآن والصلاة نوع من التأمل، بحيث تاخذ وقت لنفسك بعيدا عن أي زحام في المخ وعقلك مركز بس في الصلاة والعبادة وكأنك بتغسل نفسك، وتخرج بني آدم تاني.

وتابع: ومهم الإنسان يكون له وقت لنفسه وينضف روحه عشان يدي طاقة حلوة للي حواليه، والحمد لله كل حاجة أنا نفسي فيها عندي، وأنا مكتفي بكل الحاجات اللي في حياتي وعايز يكون عندي قناع ورضا ودايما مكتفي وقريب من ربنا وبس، وأي حاجة تيجي إضافة فهي خير وبركة من عند ربنا.

تامر هجرس: بحاول أحسن من نفسي

وأثناء الحلقة وجهت إنجي علي سؤالًا لتامر هجرس "مين تامر هجرس"، فرد هجرس قائلًا: أنا بني آدم زي أي شخص تامر بحاول أحسن في نفسي وشخصيتي، وأوصل لمعنى القناعة والحب والسعادة، وبحب يكون فيه حاجة مستديمة في حياتي تسندني دايما زي الدعاء، وربنا يديك وسائل وطرق تكتشفها عشان لما تقع في أي حفرة تلاقي حاجة ترفعك.

تامر هجرس وإيناس الدغيدي

وسبق وأن تحدث الفنان تامر هجرس عن المخرجة إيناس الدغيدي وكواليس تعاونهما الفني، وذلك خلال لقاء له ببرنامج أسألني على الصفحة الرسمية لقناة سي بي سي.

فقال الفنان هجرس: إيناس الدغيدي اللي في قلبها على لسانها، ملهاش كبير، ودي حاجة بحبها جدا، هي صريحة وبتبقى عارف دايما أن هي دايمًا تقول الحق.

وتابع: لو هعمل سيرة ذاتية لفنان هيكون عمر الشريف، وإيناس كانت دايما تقولي أني ساعات في الكلام بيجيلك النبرة بتاعت عمر الشريف، فكانت دايما توقفني في التصوير وتقولي لا، أعمل نبرة عمر الشريف.