رحاب الجمل عن فيلم مستر اكس: كنت متحمسة له جدًا لأنه مع الفنان الإنسان أحمد فهمي

كشفت الفنانة رحاب الجمل عن كواليس فيلم مستر إكس بطولة الفنان أحمد فهمي، الذي انطلق عرضه في موسم عيد الأضحى المنقضي.

تحيا مصر يرصد كواليس فيلم مستر اكس. 

كواليس فيلم مستر اكس

وقالت رحاب الجمل خلال مداخلة هاتفية في برنامج كلاكيت عبر إذاعة نجوم إف إم: يارب يكون تعبنا وحبنا للفيلم وصل للجمهور ولكل اللي شافوا الفيلم، فرحانة لما بدخل على السوشيال ميديا عموما ردود الأفعال مبهرة والناس مبسوطة بالفيلم والناس بتقول إن الفيلم صيفي وأحلى مما توقعوا وشبابي.

تصريحات رحاب الجمل 

وتابعت: عملنا مجهود رهيب وإحنا شغالين، وفيه سنة وشوية قبل التصوير أحمد فهمي والمخرج الجميل أحمد عبد الوهاب وأمجد الشرقاوي اشتغلوا فيها على الورق، وأنا كنت متحمسة جدا؛ لأنها تاني تجربة ليا مع النجم الفنان الإنسان أحمد فهمي مش عارفه أقول إيه لساني بيعجز إنه يوفيه حقه بجد، من أجمل الناس اللي اشتغلت معاهم أخلاقيًا وفنيًا بيحبنا كلنا ومهتم بينا كلنا وفرحان بينا كلنا.

وأضافت: الضحك في الكواليس مش بيقف وبنحب بعض بجد، وفيلم مستر إكس من الأعمال القليلة جدًا اللي اشتغلت فيها ببقى بخلصها وهعيط إنها خلصت وكلنا كنا متضايقين، ويوم عرض الفيلم كنت فرحانة إني هشوفهم كلهم وكان يوم مبهج إني هشوف نفس الناس.

واختتمت حديثها قائلة: هنا الزاهد دي بونبوني دي الفراشة ودمها سكر ورقيقة جدا، حتة شيكولاته بتاعت الفيلم، هي وأحمد فهيم ليهم كيميا مع بعض وربنا يباركلهم، أما أوس أوس بيعمل مقالب محدش نجا منه ومن مقالبه، هو عامل زي الطفل الشقي وطيب جدا وبيضحكنا طول الوقت وبيجيبلي الكلام والله، أستاذ أحمد عبد الوهاب كل شوية يقولنا والنبي سيطروا عايزين نشتغل.

فيلم مستر اكس

فيلم "مستر إكس" بطولة أحمد فهمى، هنا الزاهد، أوس أوس، بيومى فؤاد، محمد أنور، محمود حافظ، رحاب الجمل، أمير شاهين، العمل قصة أمانى التونسي، وفكرة محمد سويلم وفادى أبو السعود، إخراج أحمد عبد الوهاب وتدور أحداثه حول أحمد فهمى الذي يمتلك شركة يساعد من خلالها الرجال لكي يطلقوا زوجاتهم، والمحافظة على حقوقهم.

وتعتمد أحداث فيلم مستر إكس على ظهور عدد كبير من صيوف الشرف وعلى رأسهم عمرو يوسف، أكرم حسنى، ريم مصطفى، مى عمر، مصطفى خاطر، رانيا منصور، صبرى فواز، فرح الزاهد، بيج رامى، علاء مرسى، حجاج عبد العظيم، أحمد فهيم ومن نجوم الرياضة مجدى عبد الغنى، جمال حمزة، إبراهيم فايق.