رامي عاشور: مستحيل أشتري مشاهدات بفلوس ومش هدخل مجال التمثيل عشان حد من عيلتي فيه

صرح المطرب رامي عاشور العديد من التصريحات عن حياته الشخصية والمهنية ورأيه في عدد من أنواع أغاني مثل أغاني الراب والمهرجان وغيرها، وذلك على هامش حفله الغنائي في مساء أمس الجمعة الموافق 29 من شهر سبتمبر.

تحيا مصر يرصد في ذلك التقرير أبرز تصريحات رامي عاشور 

رامي عاشور: بختار الاغاني التوكسيك لأنها بتوصف الحقيقة 

قال رامي عاشور خلال لقائه بموقع تحيا مصر: الاغاني بتاعتي كلها توكسيك بسبب اني مش بتكلم من برة مش عايز أقول حبيبي وروحي وقلبي وحياتي وبموت فيك عايز أرصد الحاجات اللي الناس بتعيشها فعلا.

رامي عاشور: صعب أعمل كل يوم أغنية وفيه ناس كتير بتشتري المشاهدات 

وعن سبب قلة أعماله الغنائية، قال رامي عاشور: الموضوع صعب جدا وعايز فلوس كتير جدا، عايز نجيب حد يكتب ويلحن ويوزع، أما كنت لاعب اسكواش كنت بلعب لوحدي وبكسب وبخسر لوحدي لكن الاغنية ناس كتير اوي بيشتغلوا عليها فالموضوع محتاج فلوس، ونجاح الأغنية بحسه سهل اوي وصعب أوي سهل عشان السوشيال ميديا وصعب عشان الدنيا زحمة فعشان حاجة تبان لازم تكون مختلفة وفيها فكرة أو حاجة ملهاش معنى خالص وضايعة فالناس تدخل عليها تتفرج فتعمل مشاهدات.

وتابع حديثه: في ناس كتير بيعملوا مشاهدات فيك لكن أنا لا بكون عايز انام كويس وضميري مرتاح.

موقف رامي عاشور من دخوله مجال التمثيل 

وعن موقفه من دخول مجال التمثيل، قال رامي عاشور: يعني عشان حد عندي في العيلة ممثل يبقى اروح أمثل، عيب طبعا، أنا بحب المزيكا لكن لو فيه حاجة لايقة عليا في التمثيل هعمله دا ولكن مش هدخل عشان عندي حد من العيلة ممثل.

وأكثر النجوم الذي يود عمل ديو غنائي معهم، قال رامي عاشور: الموسيقى العربية افتقدت لحاجات كتيرة جدا، ونفسي اعمل دويتو مع وائل كافوري وويجز ومروان موسى، واتمنى اعمل حاجة مختلفة وتليق عليا.

أغنية عيش بزيادة لرامي عاشور 

وكان قد تألق رامي عاشور من أغنية "عيش بزيادة" من كلمات رامى عاشور و ياسمين الهيوي وألحان رامى عاشور، وتوزيع موسيقى MAZ، وشارك فى التصوير كضيوف شرف منهم المهندس سميح ساويرس، وعمرو منسى، ونور الشربينى، وعلى فرج، وآخرين.

وقدمت هذه الأغنية بمناسبة مرور 10 سنوات على انطلاق بطولة الجونة للاسكواش، وتدور حول أبطال رياضة الاسكواش والتحديات التي يواجهونها.