خاص| فادي النجار: نجوم مسلسل حدث بالفعل لم يتدخلوا في السيناريو.. وبسمح بالتدخلات بشرط

أكد السيناريست فادي النجار، مؤلف مسلسل حدث بالفعل، أن نجوم ونجمات العمل لم يتدخلوا في السيناريو، مشيرًا إلى أنه لا يمانع تلك التدخلات ولكن بشرط.

تحيا مصر يرصد تفاصيل تصريحات فادي النجار عن حدث بالفعل

تصريحات فادي النجار عن مسلسل حدث بالفعل

وقال فادي النجار في تصريحات خاصة لموقع تحيا مصر: احنا معانا نجوم صف أول بس مفيش ولا حد اتدخل في السيناريو، والناس كانت احترافية جدًا، وكانت الحكايات عجباهم جدًا لأنها حصلت بجد، فمكنش فيه أي تدخل منهم في السيناريو بأي شكل.

وتابع: الاقتراحات كلها متاحة أن نجم كبير يقترح دا طبعا يبقى إضافة لو الاقتراح ماشي مع العمل الدرامي، أنا بسمع كل الاقتراحات ومعنديش مشكلة أغير أي حاجة لمصلحة العمل، والمخرج طبعا من حقه تدخل في السيناريو باتفاق ما بينا، وبنتكلم.. أنا مش من الكتاب اللي هو اللي أنا كتبته يتنفذ زي ما هو لا طبعا مفيش حاجة اسمها كدا.

فادي النجار: الفن مش رسالة

وسبق وأن كشف السيناريست فادي النجار، مؤلف مسلسل حدث بالفعل، عن رأيه في الانتقادات التي وجهت إلى الأعمال الفنية التي تتناول عالم الجريمة، مثل حكاية حدث بالفعل، ومسلسل سفاح الجيزة، نظرًا لتأثيرها السلبي على المجتمع وأفراده.

وقال فادي النجار في تصريحات خاصة لموقع تحيا مصر: أنا دايما بقول الفن مش رسالة، الفن أول حاجة هدفه الإمتاع، أنك تمتعي المشاهد، ويتفرج على حاجة ويتبسط بيها، لو الحاجة مش ممتعة مش هيتفرج، دا أول ركن من أركان الفن الإمتاع، ولو مسئوليتي أني أوعظ الناس أو أقول للناس متعملش دا وأعمل دا، دي مش مسئوليتي خالص كمؤلف.

وتابع: أنا مسئوليتي أني أحكي حكاية ممتعة تخليك تتفرج وتفكر بس، لكن مش مسئوليتي خالص أني أرسخ أي حاجة، وبعدين سواء سفاح الجيزة أو حدث بالفعل دي حاجات حصلت حوالينا، هل احنا مش عايزين نسمع حكايات حصلت حوالينا.. هو دا السؤال.