حوار| حمدي عباس: كواليس الخميس اللي جاي كانت الكوميديا فيها أكتر من الورق و حنان ترك دخلت المستشفى بسببي في مسلسل سارة
ADVERTISEMENT
يشارك الفنان حمدي عباس الشهير بشخصية محروس في مسلسل سارة، حاليًا في فيلم الخميس اللي جاي للفنان عمرو عبدالجليل، ومن المقرر طرحه خلال الأيام المقبلة بجميع دور العرض.
وأجرى تحيا مصر مع الفنان حمدي عباس حوار ليكشف لنا عن دوره في فيلم الخميس اللي جاي وكواليس العمل مع أبطال الفيلم وكواليس مسلسل سارة مع الفنانة حنان ترك
حدثنا عن دورك في فيلم الخمبس اللي جاي؟
أنا بعمل شخصية خليل دراع سالم بيه اليمين اللي بينفذ كل مخططاته الإجرامية الفيلم رعب كوميدي لكل الأسرة.
هل تتشابه شخصية خليل مع حقيقة الفنان حمدي عباس؟
أنا مش شرير بصراحة أنا غلبان جدًا لكن بعمل كوميديا كتير الحمدلله وبحب أفرح الناس في واحد صاحبي لما بفتكره بشوف الروح الشريرة بيعمل فينا مقالب كتير.
كيف كانت كواليس الخميس اللي جاي خاصةً أنه فيلم كوميدي؟
الكواليس كان في كوميديا أكتر من الورق بصراحة، الفيلم كوميدي لكن الكواليس كلها ضحك وهزار وحب للناس كلها لأن كل فنانين العمل أصدقاء برا العمل قبل جوه.
مع من تجمعك أكثر مشاهدك من النجوم المشاركين؟ ومن النجوم الأقرب لك على المستوى الشخصي؟
أكتر مشاهدي في الفيلم مع الفنان عمرو عبدالجليل مع صديقي وحبيبي وعشرة عمري محمد حسني وإنما إنسانيًا أقرب ليا مي كساب إسلام إبراهيم ومحمد حسني.
هل الرعب يسيطر على أحداث الفيلم؟
الرعب مش مخيف أكتر من الكوميدي يعني هتخض بس هضحك وهيعجب المشاهد.
ما سبب انجذابك لفيلم الخميس اللي جاي؟
أنا مش بحب أعمال الرعب لكن لما لاقيت رعب كوميدي فخلاني حبيت فكرة الرعب عمومًا.
ما سر تسمية فيلم الخميس اللي جاي بهذا الاسم؟
الخميس اللي جاي هي قعدة الفيلم الخميس هو الفرح اللي أتحرق كل أبطال الحدوتة القديمة اللي حصلت من 80 سنة اللي هما بقوا عفاريت دلوقتي وكل خميس بتحصل نفس الحدوتة بيحصل فرح وبينتهي بحريق ولازم الخميس اللي جاي اللي هو آخر خميس تتحل العقدة دي والفرح يتم عشان العفاريت تمشي ويسكن مكانهم ناس طبيعيين.
ما سر ابتعادك عن الوسط الفني بعد تألقك في شخصية محروس بمسلسل سارة؟
أنا مبتعدتش عن الفن، ولكن الميديا فيها أعمال كتير وزحمة ممكن أكون بعمل حاجات مابتتشافش كويس وفي أعمال تانية بيتشاف.
هل توافق على كل الأعمال التي تعرض عليك من أجل الظهور والانتشار أم أن لديك معيار تجدد بها أدوارك؟
أوقات بوافق عشان مفيش شغل وأوقات بقول لا أنا مش عايز أعمل ده في مراحل معينة.
صف لنا شعورك بعد مشاركتك وسط كوكبة من ألمع النجوم؟
سعيد طبعًا بالشغل مع ناس أنا بحبها ومعظمهم شوفت تجارب نجاحهم زي بيومي فؤاد عشت تجربة نجاحه وأشتغلت من وهو ممثل في المسرح زمان وهو صغير لحد ما بقى نجم كبير وده شيء بيدعو للفخر أن صديقي سوبر ستار، وعمرو عبدالجليل طبعًا أستاذ بقيمة كبيرة لازم أبقى عايز أشتغل معه وأقف جنبه.
ما رأيك في انتشار بيومي فؤاد في أغلب الاعمال الفنية في نفس الوقت؟
بيومي فؤاد ربنا يكرمه ويعمل كل الأعمال الموجودة في السينما لأنه هو أنسان محبوب وكلنا بنحبه كـ فنانين وماشوفتش حد من صحابه الفنانين بيحقد عليه ويقول إشمعنا هو بيشتغل وأنا مابشتغلش هو تعب كتير وعاني كتير بصراحة فحقه أنه يشتغل كويس.
أبرز أعمالك التي نالت إعجابك؟
عملت مسلسل طلعت روحي وكنت بحب الشخصية جدًا واد سوسة وعايز يعرف كل حاجة وفي متلازمو معه وهي حامد الخواجة عارف كل حاجة.
حدثنا عن دورك في مسلسل سارة حيث أن الشخصية كانت شريرة أيضًا؟
مسلسل سارة مكنش رعب لكن شخصية كانت شريرة شوية وأنا مكنتش بحب الشر أوي فعملت بشكل كوميدي في نفس الوقت، محروس كان شرير بس عبيط شويه وبيحب سارة.
ما الموقف الذي جمعك بالفنانة حنان ترك ولم تنساه؟
كان في مشهد بمسلسل سارة بدخل على حنان ترك المطبخ وهي فنانة جميلة وتتحب وهي صغيرة وحجمها صغير جدًا وأرضية المطبخ كلها مزحلقة وهي بتمسح لأن أحلام الجريتلي الله يرحمها مستعبداها وخليتها تعمل كل حاجة وأنا بدخل عليها وأقلها بحبك وعايز أتجوك وبتقولي لأ والمفروض أمسكها من إيديها بقولها هتجوزك يعني هتجوزك فجأة لاقيت رجلها في إيدي بدل إيديها ووقعت على الأرض أتزحلقت ودخلت المستشفى يومين بسببي وطول المسلسل قعدت طول المسلسل أتعذب نفسيًا لأنها دخلت المستشفى بسببي، والمسلسل عدى عليه حوالي 18 سنة
وجه كلمة للفنانة حنان ترك؟
حنان ترك اشتغلت معها حوالي 3 أعمال، وفي آخر كل عمل بتحب تهادي كل فريق العمل بتجيب مصاحف للناس كلها وبتعمل يوم عزومة للعمل كله، ربنا يكرمك ويارب كلنا نبقى زيك.
جوجل نيوز
تطبيق نبض
