بدرية طلبة لمنتقديها: أنا وطنية ومش محتاجة أطبل لبلدي.. واللي عملته خطر عليا يا أبو المفهومية

خرجت الفنانة بدرية طلبة عن صمتها، وعلقت على المنتقدين لها، فيما يتعلق بالشات الذي نشرته بأن هناك سيدة إسرائيلية قد دعتها لحفل في إسرائيل ولكن بدرية طلبة قد أهانتها لذلك، وكشفت عن ذلك بعد تعرض الفنانة أنغام للتهديد من أفيخاي أدرعي المتحدث الرسمي للجيش الإسرائيلي والتي شنت عليه حربًا كلامية.

تحيا مصر يرصد لكم رد بدرية طلبة على منتقديها بسبب محادثة عبر تطبيق الواتساب مع سيدة إسرائيلية طلبت منها حضور حفل إسرائيلي

بدرية طلبة: عشان لا هطلع في مداخلة مع حد ولا هجاوب على أسئلة حد

قامت بدرية طلبة بعمل بث مباشر عبر حسابها الرسمي بموقع تبادل الصور والفيديوهات الإنستجرام، منذ قليل، لترد على المنتقدين وقالت في البث: "السلام عليكم أزيكم أنا بس عايزة أقول كلمتين عشان لا هطلع في مداخلة مع حد ولا هجاوب على أسئلة حد، ده بالنسبة للسادة اللي بيتصلوا بيا عشان الاستفسار، بالنسبة للمشككين أنا قاعدة في أمان الله لاقيت على الواتساب الرقم أنا مش واخدة بالي مين اللي بيكلمني ولا في إيه، ومعرفتش الرقم ده منين إلا بعدها بيوم أو يومين، لاقيت واحدة زي ما أنتوا شايفين في الشات بتقولي أنهم عايزيني في حفلة رديت وقولت أشوف للآخر يمكن حد عامل مقلب زي ما بيقولوا، بس أيًا كان أنا رديت باللي يمليه عليا ضميري من ناحية الناس دول ومن ناحية بلدي، يعني أنا ست وطنية ومحدش يشكك في ده نهائي يعني الحمدلله مش محتاجة أني أطبل لبلدي لأن دي بلدي اللي عايشة فيها واللي محمية فيها وبمثل اسمها في أي دولة بروح فيها برا". 

درية طلبة: اللي أنا عملته ده غلط عليا أني أنزل شات

واستكملت بدرية طلبة من خلال البث المباشر، وقالت: "على فكرة اللي أنا عملته ده غلط عليا أني أنزل شات لأن أنا بسافر دول ببقى ماشية ممكن جنبي حد إسرائيلي، بس أنا محتفظة به من شهر 3، وكاتبة لي الحفلة 25 إبريل 2023، أنا منزلة الشات لسبب بعد 7 شهور لما لاقيتهم، بيتطاولوا على الأستاذة الفنانة الميجا ستار صوت مصر أنغام، وأنتوا بتتطاولوا عليها وبتهددوها وبتقولوا إحنا هنبيدكم زي ما أبادنا الفلسطينيين، ده أنتوا أهو جيتوا لي عايزني أروح حفلة وأنا ظبطتكم وده الهدف من أني أحط الشات اللي عندي موجود عندي من 7 شهور".

كما أكدت سبب وجود كلمة اليوم في الشات وقالت بدرية طلبة: "واللي بيشكك عشان مكتوب اليوم لأن أنا عملت أسكرين في نفس اليوم اللي رديت فيه يا أبو المفهومية يا أبو العُريف فكر وبعدين أتكلم، والرقم عند حضراتكم موجود، لكن أنا اكتشفت أن فعلًا من نفس المكان طيب أنتوا بتشتغلوني ليه وكمان برقمكم، أنتوا عيب عليكم أنكم تدخلوا برقمكم تكلموا فنانة مصرية وتديكم على دماغكم وهو ده المقصود، وأنتوا عارفيني ماشية بمبدأ أنا وأخويا على ابن عمي وأنا وابن عمي إلى الغريب لكن واضح أن اللي مش عاجبك الموضوع وواخده على صدره أوي أنت واطي دي بتاعتك أنت مش حابب أن يكون المصرية زيها زيك دمها دمك وتكون جدع فـ دي بتاعتك، أنا معروف عني". 

"أنا لا محمد صلاح والنبي أطلع قولي إيه ولا محمد رمضان اللي بقى تبارك الله عالمي هو ومحمد صلاح، أنا ممثلة مصرية حصل معايا موقف لاقيت زميلة كبيرة مينفعش أن حد يدخل يتطاول عليها من الأشكال بتاعتهم، فدخلت وقولت لهم لأ عندكم أنتوا بتكلموا الأستاذة وهي فعلًا الأستاذة حتى لو هي أصغر مني في السن هي أستاذة وميجا ستار وكبيرة أوي وكلنا بنفتخر بها أنتوا داخلين تقولوا لها كده طيب تعالوا ليا كده أنا ممثلة على قدي طلبتوني أني أروح عندكم حتى لو بيشتغلوني وأنا شتمتكم يعني حاولت أوريهم أن أنتوا ولا حاجة". 

بدرية طلبة: عملت لها بلوك بعد ما ظبطتها ولو متفبرك مش هطلع نفسي على المسرح قدامكم

وأكدت بدرية طلب صحة الشات ونفت ما يقال حول أنه مفبرك، وقالت: "أنا اللي عملت لها بلوك بعد ما ظبطتها، وبعدين ده لو متفبرك أنا مش هطلع نفسي على المسرح قدامكم لأن أنا ست لساني طويل، ده اللي حصل ومش هرد على حد". 

واسترسلت قائلة: "يعني ما شاء الله لما طلع باسم ظبطهم كما مبسوطين وأنا أول واحدة على صفحتي نزلت الحوار بتاعه، واللي يقدر على حاجة يعملها، لو عيل صغير رفع علم فلسطين ده إحنا نفرح به ونشجعه، أنتوا جايين لواحدة عادي جدًا يحصل معها ده طلب في حفلة وترفضها تشككوا عادي شككوا وإن شاء الله عنك ما صدقت".

بدرية طلبة: إحنا في موقف لا نحسد عليه

"لا تعالى ياللي بتتفذلك على فنانة اللي يوم ما تشوفها تطلب منها صورة ممكن تقولك لا مش فاضية، دي الأستاذة أنغام مينفعش تكلمها كده، عشان أنا معلمة عليكم أنتوا عايزين ممثلين مصر إزاي بتتمنوا يسلموا عليكم، وعايزة أقولكم أني الحمدلله في العالم كله في الدول الأجنبية والأوروبية والجاليات المصرية بتحبني ونفسهم يشوفوني وأروح لهم، ووارد جدًا أني أروح مكان من ده أو أكون موجودة في حفلة وجنبي واحد إسرائيلي ويعمل معايا أي موقف مش حلو، يعني أنا عرضت نفسي لخطر، كفاية بقى وجع دماغ إحنا في موقف لا نحسد عليه، مطلوب مننا نوقف ونبقى قد الموضوع ونقف جنب فلسطين فبدل ما نحارب في بعض نعمل اللي ربنا يقدرنا عليه معهم ومعانا، على الرغم من أني مؤثرة جدًا واللي يشكك في ده مع نفسه، وأهدوا على نفسكم شوية يا غلو يا حقدو عشان أنا عارفة من جواكم أنتوا عاملين إزاي".

وفي النهاية اختتمت بدرية طلبة قائلة: "أنا كده جاوبت على كل حاجة عندي بروفة وشغل نازلة لأكل عيشي، والشات هيفضل موجود مش هشيله للي عايز يرجع له".