مسلم: صوتي أقوى من عمرو دياب وعمري ما اعمل زي محمد رمضان

حل مطرب المهرجانات الشعبية مسلم، ضيف على برنامج أسرار والذي تقدمه الإعلامية أميرة بدر على شاشة قنوات النهار، والذي تحدث من خلاله أن مقارنته بمطربي المهرجانات الشعبية ورأيه في محمد رمضان وعمرو دياب.

مسلم: حمو بيكا وحسن شاكوش كانوا ناجحين مع بعض لكن دلوقتي خلاص عشان مطوروش من نفسهم

وقال مسلم في تصريحات رصدتها موقع تحيا مصر: "عمري ما اتخانقت مع بيكا وشاكوش وعمر كمال، وكانوا ناجحين مع بعض لكن دلوقتي خلاص عشان مطوروش من نفسهم، كانوا بيعملوا الموسيقى واحدة وبيغيرو الصوت بس مفيش جديد، مفيش سكة جديدة، اللي نجح ويجز وعفرتو انهم عملوا سكة جديدة، وطوروا ولما كنت في حفلاتهم لقيت ناس سنها كبير في الحفلة".

 مسلم: كنت بلقح بأغنية يا أصفر على حودة بندق

وعلق مطرب المهرجانات مسلم على مقارنته بنجوم الغناء ومطربي المهرجانات  قائلاً: أغنية يا اصفر كانت من وحي خيالي وكان فيه مشكله ساعتها معايا، وهي سبحان الله نجحت، وغنيتها لواحد كان صديقي جدًا، ودلوقتي حبيبي وبموت فيه، وهو حودة بندق، وهو دلوقتى اخويا، كانت مشكلة واحنا صغيرين وهو طالع من قبلي وهو محترم ومن الناس اللي شقيت ولما اتشهرنا مع بعض حصلتلنا عين بعدتنا عن بعض، فا استفزني بالكلام رحت رديت عليه بالشغل، وغنيتهاله، واتحسدنا لأننا نجحنا مع بعض كتير زي اغنية خطر جايبة 140 مليون وعاملين البوم مكسر مصر.

واستكمل: المقارنة بيني وبين عصام صاصا وحودة بندق، كل واحد ناجح في حتته، وانا مش شايف نفسي مع دول، مش معنى كده انهم وحشين، انا صنعت حتة ليا، انا مش شايف منافس ليا، ولما بغني مع اي حد، بحط حتتي، ودي أجمل حاجة بعملها، مش عايز انافس غير نفسي، والطمع في البني آدم.

مسلم: في أعلى من عمرو دياب لأن صوته مش قوي 

واستكمل مسلم حديثه، قائلا: فيه اعلى من عمرو دياب، وحسين الجسمي اعلى واحد في العالم ليا، وعمرو دياب 40 سنة على القمة عشان تقيل ومختفي دايمًا، نفسي اتميز زي سعد لمجرد، لأنه سكتي، وعمرو دياب مش محتاج حد يقلده لان صوته عادي، ومش قوي صوتياً، لكن تسمعه تحبه، اما انا الاتنين، لو ربنا كرمني ووقفت قدامه هنشوف الحتة دي، لان هيبقى رأي الناس، وأنا 23 سنة وعامل كده ما بالك لو 30 سنة هوصل لفين.

مسلم: رجعت أنا وخطيبتي ومرضناش نقول.. وزعلان أني مبقتش أصلي

مسلم: رجعت لخطيبتي ومأعلنتش عشان متقولش ده بتاع تريند

مسلم: محمد رمضان ناجح بس عمري ما اعمل زيه   

واختتم: ورأيي في محمد رمضان انه ناجح، و اللي بيعمله حرية شخصية، لكن عمري ما اعمل كده، لانى بعمل الفلوس لنفسي، محبش حد لسه بيحاول يجتهد يشوف اللي عندي و يزعل ويضايق، لاني كنت مكانه في يوم من الايام، انا وسلطان الشن اخوات وبنتكلم وهو كويس، وعمري ما حسدت حد.