مي عز الدين: الظهور الإعلامي بياخد طاقتي وانك تبقى بطل مسلسل ده عايز تركيز

حلت الفنانة مي عز الدين ضيفة على برنامج صباح العربية لتتحدث من خلاله عن عودتها لمجال الكوميديا من خلال مسرحية زواج اصطناعي والتي تم عرضها في موسم الرياض السعودي مؤخرا ويتم عرضها في الفترة الحالية للمرة الثانية.

مي عز الدين عن غيابها اعلاميا: الحاجات دي بتاخد طاقتي 

تحدثت مي عز الدين في البداية عن غيابها اعلاميا، فقالت في تصريحات رصدها موقع تحيا مصر: الحاجات دي بقيت احس انها بتاخد طاقتي واطلع أما يكون في حاجة معينة اني اتكلم فيها غير كدة لا مينفعش وصعب وكتير اوي.

مي عز الدين: الضحك بقى صعب والجمهور مبقاش ميال للكوميدي 

ثم تطرقت بحديثها عن الكوميديا وسبب غيابها عنها، حيث قالت: مؤخرًا الضحك بقى صعب، والجمهور نفسه مبقاش ميال لـ الكوميدي، والفنان غصب عنه لما بيعمل حاجة كتير بيبقى عايز يغير.

وتابعت مي عز الدين حديثها: أنا مبعرفش أمثل كذا حاجة في وقت واحد، وكونك تبقي بطلة مسلسل ويتباع باسمكِ الكلام ده عايز تركيز جدًا في الأول، لأنك داخلة منطقة جديدة عليكِ، وبصراحة أنا اتبسطت أوي في تمثيل التليفزيون.

 وتحدثت عن دور الفنان الراحل حسن حسني في حياتها، قائلة: حسن حسني هو اللي علمني يعني إيه أفرش لـ الإفيه وإزاي أقوله، وبعتز بـ أعمالي معاه جدًا وبيوحشني جدًا.

مي عز الدين: كل اللي اشتغلت معاهم بحبهم 

واختتم مي عز الدين حديثها: كل اللي اشتغلت معاهم بحب الشغل معاهم، يعني النجم محمد سعد وتامر حسني والنجمة يسرا، عايزة أشتغل معاهم تاني، لأني بفضّل أشتغل مع ناس أنا بحبها.

مي عز الدين تؤدي مناسك العمرة عن المنتج الراحل حسام شوقي

وكانت مي عز الدين قد أجرت عمرة على روح الراحل حسام شوقي الذي توفى إثر تعرضه لحادث سير مروع على طريق الضبعة وراح على أثره أيضا كلا من المنتج تامر فتحي ومحمود كمال وفتحي اسماعيل، وكتبت مي عز الدين مرفقة فيديو لها من أمام الكعبة: اللهم لبيك عمرة عن حسام شوقي يارب الرحمة ليه وليهم كلهم يارب، ولكن لم تحضر مي عز الدين الجنازة أو العزاء بسبب تواجدها في المملكة العربية من أجل عروض مسرحيتها زواج اصطناعي والتي حققت نجاحات كبيرة في الموسم الاول من عرضها.