عاجل
الجمعة 29 مارس 2024 الموافق 19 رمضان 1445
رئيس التحرير
عمرو الديب

مأساة معاذ :"رجعت من السفر لقيت مراتي مرتبطة بـ 3 رجالة وبتقولي كانوا بيملوا عليه فراغي"

الزوجة الخائنة -
الزوجة الخائنة - ارشيفية

"مراتي كانت دايما تسألني أشمعنة الشرع محلل للراجل 4 لحد ما هي عرفت عليه رجاله وأنا مكنتش بشوف غيرها".. بتلك الكلمات روي معاذ لتحيا مصر من أمام محكمة الأسرة عن زوجته التي خانته في فترة سفره إلي خارج مع 3 رجال مؤمنة أن هذا من حقها كما هو من حق الرجال.

كنت مسافر بقالي 5 سنين عشان أجيبلها فلوس تعيشها أحسن عيشة 


بدأ معاذ حديثه لتحيا مصر :" أنا ومراتي متجوزين من 6 سنين وأضطريت غصب عني أسيبها وأسافر وهي حامل عشان جالي شغل أحسن برة وأنا كنت مواعدها أني هعمل كل اللي أقدر عليه عشان أعيشها هي وابني مرتاحين وفي أحسن عيشة حتي لو كان ده علي حساب راحتي مرتبي في الوقت ده مكنش أحسن حاجة لأني كنت لسة بحاول أشق طريقي بس كنت ببعتلها اللي أقدر عليه ".

حتي لما سافرت وسيبتها عيني مكنتش بتشوف غيرها 


وتابع :" بعد ما سافرت كنت متابع معاها أول بأول يوم الولادة وسمينا مع بعض أسم أبننا علي التليفون كنت بحاول علي قد ما أقدر أحسسها أني مش سايبها ولا بعيد عنها ومن حبي ليها لقيت ناس صحابي في البلد اللي أنا روحتها كانوا بيعرضوا عليا كتير أني أتجوز واحدة بدل حياة الغربة والوحدة اللي أنا عاشها وكانوا بيقنعوني أن ده من حقي وأنه مش هيأثر علي مراتي الأولي في حاجة بس أنا كنت بقولهم " أني راضي بحياة الغربة دي طالما الهدف منها أني أسعد مراتي وأبني وأن مهما حصل عيني مش هتقدر تشوف ست تانية لأن خلاص مراتي سكنت قلبي وروحي وقفلت عليها الباب "

أختها أتصلت بيا وقالتلي أنزل أجازة بسرعة عشان تلم مراتك 


وأستكمل :" في يوم جتلي مكالمة من أخت مراتي الصغيرة وقالتلي فيها كلام لحد اخر لحظة كنت بحاول أكدبه ومصدقهوش لكن للأسف صدقته لما شوفت صور أخت مراتي  بعتتهالي وفيها مراتي خارجة مع رجالة وكل واحد فيهم له صور لوحده قالتي " مراتك مش عاملة حساب ولا ليك ولا لينا ولا حتي لأبنها وبقي في حياتها حوالي 3 رجالة كل واحد منهم له دور في أنه يسعدها بس بشكل غير التاني وأنا بكلمك عشان تنزل أجازة وتيجي تشوف بنفسك يمكن تعرف أنت تلمها لأنها فضحتنا وجابتلنا الكلام " .

قالتلي أنا مش بخونك أنا بس بحاول أملا الفراغ اللي أنت سايبهولي ودول أصدقائي مش أكتر 


وأضاف :" حجزت علي أول طيارة بعد مكالمة أختها وقولت معرفهاش أني راجع وأعملهالها مفاجأة لكن لما رجعت محستش أنها فرحت برجوعي وكانت متوترة وأنا كمان مكنتش قادر أكتم غضبي ولا صدمتتي وفي نفس اليوم اللي رجعت فيه دخلتها الاوضة وفتحت التليفون علي صورها عشان أسألها أية دة ؟ وكلامها كله خلاني مش مصدق أن فعلا دي البني أدمة اللي حبيتها وقررت أكمل حياتي معاها قالتلي " دول أصدقاء ليا وكانوا عارفين أني قاعدة لوحدي ومعايا ولد صغير فكان واحد منهم ياخدني أنا وابني يخرجنا شوية وواحد يشوفلي طلبات البيت ويجيبهالي وواحد لو عندي مشكلة يقف جنبي ويحلهالي "
 


قالتلي أشمعنة أنت تقدر تتجوز 4 


واختتم :" ولما أنفعلت عليها وضربتها كانت الكارثة الأكبر أنها قالتلي " أنت ملكش الحق تعمل فيا كدة زي ما انت كراجل تقدر تتجوز واحدة واتنين وتلاتة أنا كمان ست وليا أحتياجات وممكن ملاقيش راجل واحد اللي يقدر يسددهالي وخصوصا أنك كنت سايبني أنا وأبنك لوحدينا 5 سنين مستني مني أية يعني ؟ " رميت عليها الطلاق وخدت أبني منها والقضية شغالة وكل قهرتي ووجعي أن الست اللي مرضيتش أشوف غيرها وأتعب عشانها في بلاد برة وأتغرب تعمل فيا كدة بس حقي عند ربنا وومش مسامح فيه دنيا وأخرة ".

تابع موقع تحيا مصر علي