تامر فرج: بقينا نعبد التريند وشركات الإنتاج بتستغله وبتسيب الفنانين قاعدين في البيت

تحدث الفنان تامر فرج عن ظاهرة التريند التي انتشرت خلال الفترة الماضية بسبب السوشيال ميديا، كما كشف أن هذه الظاهرة تؤثر بالسلب على بعض الفنانين.

تحيا مصر يرصد لكم تصريحات تامر فرج

وقال تامر في تصريح خاص لموقع تحيا مصر: التريند في حد ذاته شئ محمود انا معنديش مانع أن ولد غلبان يعمل تريند أو يطلع تريند من حقه أنه يتبسط والناس تبص عليه وجيرانه ويتبسطوا بيه.

وتابع: بعد كده البرامج والمواقع تستضيفه من حقه اهو يفرح والناس تتبسطلوا ومن حقه يفرح حتى لو مش بيقدم اي حاجه.

تامر فرج: شركات الإنتاج بتستغل التريند وبتفرض ناس على مجال الفن

وأضاف: بس الموضوع لازم يتوقف هنا لكن شركات الانتاج وشركات الدعاية تيجي تستغل هذا التريند وتفرضه على مجالات هو لا يعلم بيها وفي ناس متخصصه في مجالات دي بتقعد في البيت.

واستكمل: هنا لازم نقف مينفعش أنه يجي ياخد دور في مسلسل وفي واحد خريج معهد قاعد في البيت بياخد دوره، ومينفعش يعمل إعلان وفي ممثل قاعد في البيت مش بيعمل اعلانات.

تامر فرج: أحنا بنعبد التريند والمنتجين بيدوا الأدوار للي عنده متابعين أكتر

وتابع: لازم نفهم أن التريند موجود في كل أنحاء العالم لكن احنا هنا بنعبد التريند، وأنا بحب اقفل عليا بيتي وحياتي الخاصة تبقى ملهاش دعوة بالسوشيال ميديا واذا كان في حد بيسعى من الفنانين أنه يطلع تتريند هو معذور لان بنشوف منتجين وناس مختصين في الصناعة بيدوروا انهم يدوا الادوار لمين عنده متابعين أكتر.

واستطرد: في فكر غير مضبوظ ولازم انه يتغير عشان الأمور ترجع لمسيرها الصحيح ولازم نبعد الاعلان عن الاعلام.

وتابع: الاعلام دلوقتي بيتحكم في كل حاجة بأن الشركة الإعلانية أو الوكيل الإعلاني بقى يقول أحنا عايزين الممثل ده عشان عنده عدد متابعين كتير وكده الاعلان هيتشاف اكتر.
واختتم: أحنا مبقناش نفكر خالص في قيمة العمل اللي احنا هنعمله والمفروض نفكر فيه ونجيب الشخص اللي ينفع يعمله.

تامر فرج: هعمل دور قهوجي في مسلسل رمضان كريم 2

وسبق وكشف تامر فرج عن طبيعة دوره في مسلسله الجديد رمضان ريم الجزء الثاني والذي من المقرر عرضه في السباق الرمضاني الموسم المقبل.

وقال تامر فرج في تصريح خاص لموقع تحيا مصر: كواليس مسلسل رمضان كريم الجزء الثاني ممتعة جدًا والعمل فيه حزمة كبيرة من الفنانين اللي بحبهم زي بيومي فؤاد، وسيد رجب، وسلوى خطاب، وصبري فواز، و أنا هعمل دور مختلف خالص وهو أبن بلد وهيبقى اللوك مختلف والإداء، لاني هعمل دور قهوجي وماشي أشوف المشاريب للفنانين في المسلسل طول الوقت.