ضد تحريف السيرة الذاتية ونفسي اشتغل مع منة شلبي.. أبرز تصريحات كريم العدل في أسرار النجوم

حل المخرج كريم العدل ضيفًا على برنامج أسرار النجوم الذي تقدمه الإعلامية إنجي علي ويذاع على محطة راديو نجوم إف إم، وأثناء الحلقة تحدث العدل عن الكثير من الأمور التي تخص حياته الفنية والشخصية، وفي ذلك التقرير سيرصد موقع تحيا مصر أبرز تصريحاته في الحلقة.

أبرز تصريحات كريم العدل في أسرار النجوم

- مش بحب تقديم أجزاء تانية من أعمالي

- المنصات أضافت لينا كتير كمخرجين وبيبقى فيه مساحة أكتر للإبداع والحرية عن القنوات المفتوحة

- أنا مش ضد السيرة الذاتية ولكن ضد تحريفها، لأن معناها أنك تعمل بني آدم يخطئ ويصيب

- معتقدش أن السينما هتنقرض لأن لحد دلوقتي بتبقي عايزة تنزلي عشان تشوفي فيلم معين

- نفسي أشتغل مع منة شلبي في أي مشروع جديد

- فكرت في إخراج فيلم موسيقي غنائي ولكن المشروع صعب والمنتجين مش بيقتنعوا بسهولة

- بعمل فيلم كوميدي مع أكرم حسني ولسه بنظبط السيناريو

تصريحات كريم العدل عن منى زكي

ومن ناحية أخرى، خرج المخرج كريم العدل لـ يكشف تفاصيل جديدة عن مسلسل تحت الوصاية، الذي تخوض بطولته الفنانة منى زكي ومن المقرر عرضه ضمن مسلسلات رمضان 2023.

وكتب كريم العدل عبر حسابه الرسمي بموقع التواصل الاجتماعي “فيسبوك”، متحدثا عن شخصية منى زكي في تحت الوصاية: “اولا الجمال ده شيء نسبي.. لو انتي شايفة ان منى زكي كده وحشة، ف دي رؤيتك انتي.. انا ممكن اشوفها حلوة عادي”.

وتابع: هى يا جماعة نيكول كيدمان لما بوظت مناخيرها علشان دور، ولا توم كروز لما طلع بكرش و اصلع، كانوا بيعملوا كده علشان عايزين يقولوا ان فيه فئة معينة شكلها وحش؟! مش منطق ابداً والله".

كريم العدل يوجه رسالة لمنتقدي الأعمال الفنية

واضاف: “ثانيا انا حقيقي مش فاهم ايه علاقة التعليم بالموضوع عامة! ثالثا، هل ده معناه ان كل المحجبات قمرات و مافيهومش ولا واحدة وحشة؟ مش منطقي.. و تاني نرجع نقول ده شيء نسبي يختلف من شخص للتاني!”.

واختتم كريم العدل حديثه، فقال: رابعا بقى، منى زكي مسلسلها بنسبة كبيرة عن شخصية حقيقية، و بيحاولوا يقربوا بالشكل.. اصلا بقى، و بجد الناس بقت بتحمل الفن و الدراما فوق طاقته.. و بياخدوا كل حاجة بشكل شخصي جدا.. و طول الوقت عندهم نظرية المؤامرة، و كل واحد ولا واحدة يطلع يقول لك الكلمة اللذيذة بتاعة "السم في العسل" استهدوا بالله كده يا جماعة بجد!.