مروة عبد المنعم: مدخلتش الوسط الفني عشان الفلوس.. ومعنديش رفاهية الانهيار

تحدثت الفنانة مروة عبد المنعم عن تفاصيل حياتها الشخصية في الفترة الأخيرة، وتأثير تجربة الطلاق عليها، وذلك خلال لقائها اليوم ببرنامج الستات المذاع على شاشة تلفزيون النهار.

تحيا مصر يرصد تفاصيل تصريحات مروة عبد المنعم في الستات

مروة عبد المنعم: معنديش رفاهية الانهيار

وقالت مروة عبد المنعم: أنا معنديش رفاهية الانهيار، ودا لوحده بيتعب أوي، أنا لما بحب أعيط مش بعيط في بيتي لأن فيه مراقية من عيالي، فبقولهم أنا نازلة أجيب حاجة وأركب عربيتي وأمشي في الشارع وأقعد اصرخ وأعيط، وأرجع.

وتابعت: أنا مشكلتي بدأت من بعد الثورة، مبقاش فيه إقبال على الشغل، ومعرفش ايه السبب، وطلاقي كان أصعب من قضية البنت اللي كانت شغالة عندي وماتت، في القضية حسيت بظلم واتهام الناس ليا من غير ما يفهموا الموضوع، ولما حصل دا سيبت فيلتي وروحت شقة إيجار، وبعدها حصل الانفصال.

السبب وراء قلة مشاركة مروة عبد المنعم في الاعمال الفنية

واستكملت: والانفصال له رهبة زيه زي الموت يعني مرعب، وجه فجأة وأنا اللي أخدت القرار، وأبو أولادي إنسان محترم جدا جدا وعايش جمبنا وبيننا حالة صداقة، ومن بعد الطلاق مبقاش يجيلي شغل خالص.

واستطردت: وممكن يكون ضعف علاقاتي في الوسط الفني من أسباب أنه مش بيجيلي شغل، بس قبل كدا كنت بشتغل من غير علاقات.. وأنا بحب الفن جدا ومش داخلة الوسط عشان أبقى مشهورة أو عشان يبقى معايا فلوس لا.

انهيار مروة عبد المنعم من البكاء

وسبق وأن انهارت الفنانة مروة عبد المنعم من البكاء على الهواء مباشرة، بعد حديثها عن الأشخاص الذين تخلوا عنها في محنتها، وأثناء ابتعادها عن الفن.

وقالت مروة عبد المنعم خلال لقائها في برنامج "قعدة ستات"، المذاع على شاشة "القاهرة اليوم" وتقدمه الإعلامية مروة صبري: كنت لسه بقول لبنتي مش عارفه أنا صرفت عليكم طول السنين اللي فاتت دي ازاي؟ بس بتمشي، أنا وقفت جمب نفسي محدش وقف جمبي، طبعا بعد ربنا، ربنا ده عظيم وكريم ، بقعد ساعات أقول أنا بصرف السنة دي ازاي.