مروة صبري تفتح النار على ميرهان حسين: أنتي بتضحكي على مين وبتتلاعبي بالجمهور

انتقدت الإعلامية مروة صبري، مقدمة برنامج قعدة ستات المذاع عبر قناة ألفا، الفنانة ميرهان حسين بعد تراجعها عن قرار الاعتزال.

تحيا مصر يرصد انتقاد مروة صبري للفنانة ميرهان حسين.

مروة صبري تنتقد ميرهان حسين 

قالت مروة صبري خلال برنامج قعدة ستات: أنا آسفة إني صدقت وببساطة شديدة اتضحك علي، أنا معرفهاش شخصيا لكن بحبها كفنانة، وصعب علي يكون حد تحت ضغط نفسي لأي سبب من الأسباب".

وتابعت: "الواحد لما يبقى متضايق وواقع تحت ضغط نفسي وكتب بوست واعتزل وهاجم كل الناس، هل الموضوع ممكن يستغرق أقل من شهر شهرين تلاتة علشان يقدر يتعافى؟ إحنا بسم الله ما شاء الله لا سحر ولا شعوذة ميرهان حسين خرجت من أزمتها النفسية بعد من أسبوع لـ 10 أيام، وطلعت في برنامج على الهوا تتكلم عادي، وتقول أنا معتزلتش الفن أنا اعتزلت السوشيال ميديا".

هجوم مروة صبري على ميرهان حسين 

واستطردت: "إنت بتضحكي على مين، وبتتلاعبي بالجمهور، هو فكرة إني أعتزل وأرجع بقت لعبة؟.. هي أكيد فنانة واعية وعلى قدر من النضج، وفاهمة كويس إنها قدوة وناس كتير بتحبها، ولو عملت حركة زي دي هتخسرهم، ولكن فعلا طلعت بتاخد تريند، وحتى التريند فاشل ومكملش 10 أيام".

واختتمت مروة صبري حديثها قائلة: "أعتذر إني صدقت ميرهان حسين، إنت حرة في قراراتك، لكن مش حرة تجرحي في فنانين زمايلك وتشككي في موهبة ونجاح حد غيرك لمجرد إنه مش رزقك".

على الصعيد الآخر، قالت الفنانة ميرهان حسين خلال حلولها ضيفة على برنامج كلام الناس إنها تخشى الحسد بشكل كبير، معقبة: «أنا نجمي خفيف».

تصريحات ميرهان حسين 

وأضافت حسين خلال حوارها ببرنامج «كلام الناس»، عبر قناة «إم بي سي مصر»، أنها تؤمن بالحسد والعين، مشيرة إلى أن أكثر الأشياء التي تخاف الحسد عليها هي «أظافر يديها وشعرها».

وتابعت: «لاحظت أكثر من مرة لما يحد بيعلق على الحاجتين دول بالذات بتحصل حاجة، وفي بنات لما تيجي تسلم عليا دايمًا تحط إيديها في شعري عشان تشوف في اسكتنشين ولا لأ، في حسد وفي ناس نجمها خفيف أكتر من ناس».

وأشارت حسين إلى أنها تريد أن تكسر هذا الحاجز، وأن تتجاهل هذا الأمر، معقبة: «عايزة أكسر الحتة دي، مش أعتقد أوي في الموضوع».

وأكملت: «في ناس على السوشيال ميديا بيقولوا كلام حلو، بس ببقى عايزة أقولهم قولوا ما شاء الله، قولوا الله أكبر، قبل ما تقولوا على حاجة حلوة قولوا ما شاء الله، لا قوة إلا بالله»