غادة عبد الرازق: اتجوزت عشان اتحرر.. ومكنتش بحلم أكون ممثلة

كشفت الفنانة غادة عبد الرازق عن السبب وراء زواجها في سن مبكر، وذلك خلال لقاء لها ببرنامج معكم منى الشاذلي المذاع عبر شاشة تلفزيون قناة أون.

تحيا مصر يرصد تفاصيل تصريحات غادة عبد الرازق في معكم منى الشاذلي

غادة عبد الرازق: الجواز كان وسيلة أني اتحرر

وقالت غادة عبد الرازق: كان عقدتي أني نفسي أخرج، كنت بشوف يسرية أختي عشان مخطوبة بتخرج، فكنت هموت عايزة أخرج، كنت تربية منغلقة وحتى بعد ما بابا اتوفى لما كان عندي 12 سنة، فاتجوزت عشان حبيت وعشان أخرج، الجواز كان وسيلة أني اتحرر، واتجوزت شبه صالونات.

وتابعت: أول خبطة لأمي أني قولتلها أنا هطلق من بابا روتانا، وبعدها أغمى عليها، وبعد ما حصل الانفصال جات حكاية التمثيل، وكان الانفصال سلس، وأبو روتانا كان راجل في منتهى الاحترام، وقالي مش أنا اللي أحرم أم من بنتها.

واضافت: وكنت عايزة أبقى مشهورة، وروحت قولت لأمي هغني، قالتلي هتغني في الكباريهات ؟!، ومكنتش بحلم أكون ممثلة في الأول.

غادة عبد الرازق والأطباء النفسيين

وفي الحلقة ذاتها، تحدثت الفنانة غادة عبد الرازق عن تجربتها في حكاية تحت الحزام من مسلسل حدث بالفعل، وقالت: هما مكانوش تلاتة، هما كانوا اتنين، وبعدين قعدت مع المؤلف لقيته بيفتح في حاجات كتير لأن في حاجات كانت لازم تبان، زي خلفية عليا وجوزها راح فين وابنها ايه، وقولتلهم يا جماعة هعملهم 3 حلقات مع أني كنت اتفقت خلاص.

وتابعت: اللي حببني في الموضوع دا أن علياء هي دكتورة نفسية، والمفروض تعالج الناس، بس محدش تخيل أنها ممكن تكون هي شخصيا مريضة، أنا مريت بالتجربة دي مرتين، روحت لاتنين دكاترة أول ما دخلت عليهم وأنا خارجة قولت للدكتور أنا عايزة أقولك قبل ما أخرج أن أنت محتاج حد يعالجك.

تفاصيل مسلسل حدث بالفعل

جدير بالذكر أن أحداث مسلسل حدث بالفعل مستوحاة من أحداث حقيقية، حيث يتكون المسلسل من 5 حكايات، كل حكاية تضم 3 حلقات، وتدور أحداثها في عالم المرض النفسي والجريمة.

وتدور أحداث مسلسل حدث بالفعل حكاية تحت الحزام حول سيدة تخطف زوجة ابنها يوم زفافهما، وتعاقبها بقسوة، كما تتناول الحكاية عدد من الأمراض النفسية، مستوحاة من أحداث حقيقية وقعت بالفعل في الواقع، مضاف عليها خطوط درامية لتناسب قالب العمل الدرامي.