عاجل
الثلاثاء 25 يونيو 2024 الموافق 19 ذو الحجة 1445
رئيس التحرير
عمرو الديب

أحمد فهيم يتعاقد على فيلم قصر الباشا بطولة أحمد حاتم

أحمد فهيم
أحمد فهيم

انضم الفنان أحمد فهيم لقائمة أبطال فيلم قصر الباشا، بطولة أحمد حاتم ومن المقرر أن يبدأ تصوير أولى مشاهده خلال الأيام القادمة.

أحمد فهيم يتحدث عن الراحل خالد صالح

من جانبه، قال أحمد فهيم خلال لقائه الذي يرصده تحيا مصر مع المذيعة نورهان عبد الفتاح، في برنامج زووم ونص، المذاع عبر شاشة قناة “هي": المرحوم خالد صالح كان خالي وأخويا الكبير وصاحبي وكل حاجة في حياتي، واشتغلت معاه 15 سنة بداية من فيلم خلي الدماغ صاحي والنعامة والطاووس وميدو مشاكل وهي فوضة، رحلة كبيرة اتعلمت منه كل حاجة مش في التمثيل بس في الحياة كمان، لو فيا حاجة حلوة تبقى من المرحوم خالد صالح.

أحمد فهيم 

وتابع: لما قولتله إني عايز أمثل قالي مفيش حاجة اسمها عايز تمثل، ينفع تقول أنا عايز أبقى دكتور أو محامي؟ التمثيل مهنة زيها زي الدكتور والمحامي لازم تتعلم الأول وبعدين تقول أنا عايز أمثل، أتعلم الأول واتمن من أدواتك وبعدين نقول أنك ينفع تمثل، وبالفعل فضلت 10 سنين بتعلم وبتفرج، يارب أكون اتعلمن وأكون قادر أقدم للناس حاجة تليق بيهم.

أحمد فهيم يكشف عن مهنه القديمة

وأضاف، أنا اشتغلت في الحلويات زمان وحاجات كتير مش حلويات بس، اشتغلت مندوب مبيعات، وفي معرض عربيات، بس ولا حاجة اشتغلتها وكنت ناوي أكمل فيها، أنا كنت ناوي أبقى ممثل ومستني الفرصة، وكل اللي كنت بشتغله كنت بتعلم منه اللي فادني في التمثيل.

واستطرد، أنا مش طول الوقت مع أولادي بحكم شغلي، وبحاول على قد ما أقدر لما يكون في وقت فاضي أشوفهم وأسافر معاهم، والحمد لله أولادي متفهمين طبيعية شغلي، وطبعًا جدًا فرحانين بنجاحي وأصحابهم اللي مكانوش بيكلموهم من زمان يكلموهم تاني، وبقى عدهم حالة من الفرحة وأنا مبسوط إني سبب في سعادتهم، وأولادي الصغيرين لما بيمشوا معايا ويشوفوا الناس بتتصور ومعايا بقوا هما كمان يقفوا معايا يتصوروا، الحمد لله عايش حالة فنية وأسرية ناجحة.

تصريحات أحمد فهيم 

وأوضح، أنا مش أب شديد خالص أنا سهل وكل اللي يهمني إني ابسطهم ونفسي أحقق لهم كل اللي بيتمنوه، ولغاية دلوقتي محدش منهم فكر إنه يدخل الوسط الفني، وربنا يوفقهم في أي مجال يختاروه.

وحقق الفنان أحمد فهيم نجاح واسع في سباق رمضان 2023 بمسلسل جعفر العمدة بطولة الفنان محمد رمضان، زينة، إيمان العاصي، مي كساب، هالة صدقي، لبنى ونس. 

تابع موقع تحيا مصر علي