مفيش أبو تريكة| رضا عبد العال لحسام حسن: لو خايف قدم استقالتك

وجه الكابتن رضا عبد العال نجم الأهلي والزمالك السابق، انتقاد لتصريحات الكابتن حسام حسن المدير الفني لمنتخب مصر الأخيرة عن قيادة منتخب مصر عن عدم وجود لاعبين بمستوى جيد للانضمام للمنتخب.

حسام حسن: لا يوجد لاعب في الدوري يستحق الانضمام لمنتخب مصر

حسام حسن: نحن نُعاني كرويًا وعودة الجماهير هو الشيء الأهم لنا

وقال عبد العال في تصريحات لبرنامج «البريمو»، المذاع عبر فضائية «تن»: "الكابتن حسام عايز يرميلك حته غن المنتخب ضايع والفرقة ضايعة، وأنا بمسك ناس متعرفش تباصي مش هو قال كده.. وانت كنت ماسك المصري كان كده إلا في المرحلة الأولانية".

مصطفى فتحي أحسن لاعيب في مصر

وأضاف عبد العال:" لو لعبت بمصطفى فتحي هيكون أحسن لاعيب في مصر ولو لعبت بعمر كمال عبد الواحد هيبقى أحسن لاعب  في مصر، وزيزو وإمام عاشور مش قد كده في المنتخب ومش بياخدوا الفرصة في المنتخب ومحمد هاني مش أحسن باك يمين في مصر، وفيه أحسن منه وعمر كمال أحسن منه وكمان عمر جابر من أحسن الباكات اليمين، وانت المفروض يا كابتن حسام زي ما أنت بتقول بتعمل من الفسيخ شربات في الأردن متتحججش، انت معاك لاعيبة ودي القماشة ومفيش أبو تريكة وهما مخبينه عنك".

الكابتن حسام عايز يوصل حاجة للرأي العام 

وتابع رضا عبد العال:" الكابتن حسام عايز يوصل حاجة للرأي العام لو حصل حاجة يبقى أنا قولتلكم وبلغتكم ودي رقم واحد، ورقم اتنين إنه لو هو إن شاء الله ودي هتحصل ووصل لكاس العالم هيقولك ده انا اللى وصلتكم لأنني اشتغلت وخليتك توصل كاس عالم بفكري".

واستكمل رضا عبد العال: "انت يا عم حسام من البداية أنت حاسس او خايف إن انت متوصلش قدم استقالة ومحدش هيقولك حاجة، وأي حد هيمسك المنتخب هنوصل كاس عالم".

أكد رضا عبد العال، أن حسام حسن، المدير الفني لمنتخب مصر، كان ينوي عدم ضم محمد صلاح، نجم نادي ليفربول الإنجليزي للمنتخب، حال تتويج المنتخب ببطولة كأس عاصمة مصر التي أقيمت في شهر مارس الماضي.

حسام حسن طلب المشاركة في بطولة كأس عاصمة مصر

وقال رضا عبد العال: «حسام حسن، طلب المشاركة في بطولة كأس عاصمة مصر، لهدفين أول هدف أنه يفوز بالبطولة عشان يقول مش عاوز محمد صلاح، وتاني هدف، عشان يرد على الناس اللي بتقول أنه لم يحقق بطولات كمدرب».

وأضاف:« منتخب مصر، لو كان فاز بالبطولة، حسام حسن، كان هيقول مش عاوز محمد صلاح، بدليل إنه قال بعد الفوز على نيوزيلندا، أنا عاوز اللعيبة اللي هي بروح مرموش وتريزيجيه».