معنديش مصدر دخل وأشرف زكي قالي خدي من فلوسي الشخصية.. أبرز تصريحات نجوى فؤاد

كشفت الفنانة نجوى فؤاد، تفاصيل حالتها الصحية بعدما تعرضت لوعكة وذهبت على إثرها لأحد المستشفيات لإجراء بعض الفحوصات الطبية، بجانب الكشف عن اختيارها للفنانة نيللي كريم لتقديم سيرتها الذاتية في عمل فني، وذلك خلال مداخلتها الهاتفية مع الإعلامية يارا أحمد، في برنامجها نجمك مع يارا، المذاع عبر شاشة قناة “هي”.

أبرز تصريحات نجوى فؤاد مع يارا أحمد

وكانت من بين التصريحات التي رصدها موقع تحيا مصر للفنانة نجوى فؤاد مع الإعلامية يارا أحمد ببرنامج نجمك هي الآتي: 

  - وعكة عادية وكل إنسان معرض، وأنا عملت أشعة على رجلي عندي تعب في ركبي والقطنية.

 - لجأت للنقابة من شهرين أو تلاتة، علشان يساعدوني الكشف والعلاج، والنقابة معندهاش استعداد غير لعلاج بسيط وتحاليل.

 - جمهور مبيشوفنيش على الساحة خالص علشان لأني مش قادرة أقاوم أني أقف وألبس واتمكيج وأظهر بلياقتي العادي، مش قادرة الحقيقة.

 - معاش النقابة 600 جنيه بس، وأشرف زكي مالوش ذنب هو موظف في الأول والآخر، وأنا مكنش عندي رد غير أني أقوله أشوفك بخير وبشكره أنه اهتم بيا واتصل بيا.

 - أشرف زكي عرض عليا أني أخد من فلوسه الخاصة لو محتاجة، قولتله لأ مستورة لغاية دلوقتي.

 - معنديش مصدر دخل خالص، ودي حاجات بتبقى خاصة مقدرش أتكلم فيها والحمد لله مستورة.

 - الفن غدار وكل مهنة غدارة، والفن بيحب الفنان يكون بيبرق على طول وحالته السليمة على طول، وساعات بيكون في مطبات بيقع فيها الإنسان بتكون بإيد ربنا.

 - أنا معتزلة الرقص بقالي 17 سنة، ولكن مش هعتزل التمثيل.

 - بيجيلي أدوار ولكني مش قادرة أقدم عمل جيد وأكون واعية من غير مسكنات وحقن، مش عايزة أتعب المنتج اللي بياخدني أجي أقوله في النص أنا تعبانة مش قادرة أكمل، والفن ولا أي شغلانة مفيش فيها كلمة أنا تعبان.

 - ربنا قسملي الرقص ونجحت فيه، وربنا أراد أنه ينجحني في الرقص وشُفت فيه كل الأيام الحلوة، وحب الجمهور أكبر ثروة بالدنيا.

نجوى فؤاد: ندمت على قرار عظم الانجاب ونيللي كريم ممكن تجسد سيرتي الذاتية 

 - ندمت شوية على قرار عدم الإنجاب، لأن في الظروف اللي إحنا فيها دي مين كان هيربي كويس معايا، أنا مكنتش متفرغة، وكل حاجة ربنا مقسمها وكله بيتنفذ من عند ربنا.

 - بحب فيفي عبده ودينا على المستوى الشخصي بعيدًا عن هما بيشتغلوا إيه.

 - دينا عاقلة ومتطورة، وفيفي دمها خفيف والكاريزما بتاعتها بتخلي اللي مبيحبش يحب، وأنا بحبها أوي أوي وهي لطيفة وعفوية ومش مصطنعة.

 - أختار نيللي كريم تعمل سيرتي الذاتية، بحب فيها كل حاجة، ربنا يوفقها ويسعدها ويخلي ليها ولادها، هي ست جميلة ولذيذة وفيها ميزات كتير الحقيقة.

 - إن شاء الله ربنا يشفيني وألتقي بـ جمهوري في عمل فني يعوض اللي فات.

نجوى فؤاد تصارع المرض بمفردها.. تعرف على تطورات حالتها الصحية

تفاصيل برنامج نجمك 

يذكر أن برنامج نجمك مع يارا يعرض يوم أربعاء من كل أسبوع في تمام الساعة 10 صباحًا، وإعادة يوم الخميس في الساعة 1 بعد منتصف الليل، والبرنامج من إعداد مروة محمد ورانيا عبد اللطيف، على شاشة قناة هي.