عاجل
الأحد 27 نوفمبر 2022 الموافق 03 جمادى الأولى 1444
رئيس التحرير
عمرو الديب

جوزك لازم يشوفك المزة بتاعته وعامليه زي الطفل.. تصريحات الإعلامية ياسمين عز

ياسمين عز
ياسمين عز

وجهت الإعلامية ياسمين عز مجموعة من النصايح للزوجات، استفزت الجمهور بشكل كبير نظرًا لتركيز حديثها عن واجبات المرأة فقط، دون الإشارة إلى حقوقها.

تحيا مصر يرصد لكم في هذا التقرير تصريحات ياسمين عز 

ياسمين عز: اهتمي بجوزك وسيبك من السجاجيد

وقالت ياسمين عز: أنتي فاكرة أخر مرة قولتي لجوزك قصة شعرك حلو.. أو خد البرفيوم دي حلوة أوي جربها عليك!.. دايمًا حسسيه بالتاتس بتاعك في حياته، شكله.. هدومه.. الحركات دي، عشان دايمًا يكون محتاجلك، دايمًا يحس إنك لو مقولتيلوش على حاجة ولو بسيطة يحس إن في حاجة ناقصة.

وأضافت: يا شيحة ده أنتي مبقتيش بتفتحي دولابه غير عشان تفتشي في هدومه، أو تطلعي كام غيار تعمليهم فوط مطبخ تمسحي بيهم البلاط.

ياسمين عز: جوزك محتاج يحس بلهفتك

وأشارت ياسمين عز إلى بعض الطرق للتعامل مع الرجل حتى تحوز على قلبه، قائلة: والله لو اهتميتي بجوزك نص الإهتمام اللي بتهتميه لغسيل السجاجيد، وغسيل المواعين عمره ما يفكر يبص لواحدة برا غيرك.. واللي أنتي مش عارفاه إن الراجل أساسه طفل، طول الوقت محتاج رعاية واهتمام.

واستكملت كلامها: اعتبريه ابنك وشوفي معاملته معاكي هتتغير ازاي.. جوزك دايمًا محتاج يحس بلهفتك، بخوفك عليه، محتاج يحس إنه رقم واحد في حياتك، محتاج يحس إن الدنيا كلها ممكن تيجي عليه إلا أنتي ويحس إنك أمه البديلة، اللي لو طالت تطلع اللقمة من بوقها تديهاله هتعمل كده.

ياسمين عز: جوزك لازم يكون شايفك المزة بتاعته

وقالت أيضًا: هو محتاج دايمًا يكون شايف قدامه المزة بتاعته، البنت اللي ساب ستات الدنيا واختارها عشان يكمل معاها، وتكون شريكة حياته.

وأردفت قائلة: متخليهوش يندم على اللحظة دي ولا الاختيار ده، وخليكي دايمًا أجمل ست في عنيه، عشان العين بتحب زي القلب بالظبط، مش بقولك تقعدي في البيت تحطي مكياج كامل، وتنزلي تعملي شعرك كل يوم، عشان في ناس ظروفها متسمحش بده، لكن اهتمي بنفسك على قد ما تقدري، وانتي فاهمة قصدي.

ياسمين عز: لازم ريحتك تبقى حلوة والراجل يحس إنه دخل الجنة

واختتمت كلامها: لازم ريحتك تبقى جميلة، وخلي الراجل أول ما يشوفك يحس إنه ساب الضغط والزعل والقرف، ودخل الجنة بتاعته، مش اوعى تدوس على السجاد وخلي الجزمة برا، سجاد ايه! ماهو جايبها بفلوسه.

وتابعت مختتمة كلامها: ونصيحة أخيرة أوعي تزعقي أو تعلي صوتك، عشان وقتها الراجل بيشوفك راجل زيه، مش واحدة ست، خلي دايمًا صوتكك واطي وطبعك هادي، وبشوشة حتى لو هتمثلي، لحد ما يبقى الموضوع فيكي حقيقي، متبقيش نكدية عشان النكدية بتبقى كتلة نار بتحرق البيت كله، اتمنى تكوني سألتك انتي مقصرة في حق جوزك ولا لا.

تابع موقع تحيا مصر علي