عاجل
الأربعاء 08 فبراير 2023 الموافق 17 رجب 1444
رئيس التحرير
عمرو الديب

بيقولي انتي شبه البرميل.. مأساة زوجة: بيهددني أنه هيتجوز صاحبتي لو ملعبتش رياضة

سيدة - ارشيفية
سيدة - ارشيفية

الجواز والخلفة سببولي زيادة في الوزن وجوزي كل يوم بيعايرني .. بتلك الكلمات روت زوجة لتحيا مصر من داخل محكمة الأسرة عن تنمر زوجها عليها وعلي وزنها الزائد الذي ظهر بعد الزواج وتهديده لها بخيانتها إذا لم تلتزم بنظام غذائي وممارسة الرياضة مما جعلها تشعر بالخذي من زوجها وتطلب الأنفصال منه داخل محكمة الأسرة في دعوي خلع .

كنت ملكة جمال قبل ما أتجوزه 

بدأت الزوجة حديثها لتحيا مصر :" أنا وجوزي متجوزين من 8 سنين وعندنا 3 أطفال قبل ما أتجوز كنت ملكة جمال وكانت الناس كلها بتحلف بجمالي كنت محافظة علي وزني وعلي شكلي وشعري كان طويل وكثيف وكنت بشتري أغلي لبس لكن بعد الجواز والخلفة حاجات كتير أتغيرت وزني زاد من قعدتي في البيت و شعري بقي خفيف وضعيف بعد الحمل والرضاعة وعشان احافظ علي فلوس جوزي بقيت بشتري لبس بسيط ومبصرفش كتير علي شكلي عشان كنت فاكرة أني كدة زوجة أصيلة وبراعي ظروف جوزي لكن كل ده اتقلب عليا أنا في الآخر ".

بقي يتنمر عليا قدام الناس ويقول عليا شبه البرميل 

وتابعت الزوجة :" جوزي بدل ما يقدر المجهود اللي ببذله عشان أخدمه هو وأولادي مكنش مركز غير في التغيير اللي حصل في شكلي ووزني اللي زاد وده خلاه يتنمر عليا قدام عيالي وقدام أهلي ويقول عليا " دي بقيت شبه البرميل " وفي كل عيد يقولي " أنا مش هجيبلك لبس السنة دي غير لما تخسي عشان بشكلك ده مش هنلاقي حاجة علي مقاسك " ووصلت بيه كمان أنه في كل مرة يشوفني باكل فيها يشيل الأكل من قدامي ويقولي " بطلي أكل شوية هتزيدي أية أكتر من كدة " في كل مرة اسمع منه كلام زي ده كنت بتجرح وبتوجع جدا وبدخل أوضتي افضل ابكي فيها بالساعات وهو ولا حاسس ".

هددني أنه هيتجوز صاحبتي لو ملعبتش رياضة 

وأختتمت حديثها :" جوزي وصلت بيه أنه عشان يرجعني حلوة زي زمان بقي بيهددني أنه هيتجوز صاحبتي الأنتيم عشان حلوة ولسة متجوزتش وهيطلقني أنا لو ملعبتش رياضة ومشيت علي نظام غذائي في الأول كنت فكراه  بيهزر ومش بيتكلم بجد لحد ما عدا وقت وبالصدفة لقيت علي تليفونه رسايل وأهتمام  بينه وبين صاحبتي بقيت في ذهول ومرضيتش أواجهه عشان عارفة أنه هيجرحني أكتر بالكلام وكل اللي عملته أني سيبت البيت ورفعت عليه دعوي خلع عشان زي ما عايرني بوزني الناس تعايره أنه بقي راجل مراته خلعاه ومش طايقة العيشة معاه ".

تابع موقع تحيا مصر علي