شاهيناز: الحجاب مبعدنيش عن الفن وأنا ضد الإسفاف

فجرت المطربة شاهيناز، عدة تصريحات يرصدها تحيا مصر خلال حوارها مع الإعلامية إنجي هشام، في برنامج المنسي، المذاع عبر شاشة قناة هي وذلك حول الحجاب وغيرها من الأمور.

شاهيناز في برنامج المنسي

وقالت شاهيناز: أحيانًا في فيديوهات على السوشيال ميديا بتورينا مواهب حقيقية سواء في التمثيل أو الغناء، ولكن اللي يضايق أنك تجيب حد مش موهوب لا غناء ولا تمثيل وتطلعه للناس، في غيره عنده موهبة حقيقية، ولكن أنا مش ضد كلها أرزاق بتاعة ربنا.

تصريحات شاهيناز 

وتابعت، لما منتج يطلع حد مش موهوب علشان التريند ظلم وحرام، في ناس موهوبة في نفس المكان اللي بيطلع منها اللي مش موهوب، أنا مش ضد فكرة أن يكون في جديد دايمًا.

وأضافت، أنا عملت أغاني كتير كلماتها جديدة عليا، وعندي أغنية اسمها رنلي رنة دمها خفيف أوي، ومصطلحاتها زي المصطلحات اللي بيستخدموها السوشيال ميديا والشباب الصغيرين.

واستطردت، أنا مش ضد التريند كفكرة، ولكن أنا ضد الابتزال والإسفاف أو كلمة عيب تتقال، ما عبد العزيز محمود غنى أغنية اسمها يا شبشب الهنا يا ريتني كنت أنا، ومنيرة المهدية قبل أم كلثوم كان اسمها سلطانة والناس كانت شايفاها أيقونة، وكانت بتغني الحب دح دح والهجر كُخ كُخ، فالكلام كتير من زمان مش جديد.

شاهيناز تكشف عن رأيها في المهرجانات

وأردفت، المهرجانات لون موسيقي فرض نفسه والناس بتحبه، ولكن نختار الكلام وننقي المفردات.

و عن فترة غيابها عن الساحة الفترة خلال الفترة الماضية، قالت شاهيناز: كل حاجة في الدنيا قدر وأنا خدت قرار الابتعاد عن الفن بمحض إرادتي ومحدش غصبني، وابعدت وقت ولادة ابني وقررت اتفرغ له تمامًا، وأنا بشوف أن الطفل ده مسؤولية كبيرة وحسيت أن هو أولى بوقتي واهتمامي، وأنا في الفترة دي نفسيًا كنت حاسة إني عايزة ابعد عن كل حاجة، وأفضل جنب ابني أكتر حد بحبه في الدنيا.

وأوضحت، فترة غيابي عن الفن خلتني اتجه للحجاب، ولكن الحجاب مبعدنيش عن الفن وبعد ما اتحجبت بـ سنتين أو 3 سنوات غنيت، عملت أغاني اجتماعية ودينية وأنشودة مديح في الرسول، وعملت أغنية اسمها شكرًا أوي وكنت مرتدية الحجاب، والحجاب مكنش عائق في إني أغني.

وتابعت: أي ست في الدنيا لما بتاخد خطوة الحجاب بتبقى مبسوطة، ومين عارف أنا ممكن ألبس الحجاب تاني، أنا مبرفضهوش ولكن في الفترة الحالية أنا غير قادة إني أفضل مرتدية الحجاب، وشيلت الحجاب من حوالي 10 سنين، وعملت ألبومات وأغاني سينجل تاني.

وأكدت، أنا فعلًا اختفيت شوية، ولكن أنا من 2017 لغاية دلوقتي عملت رصيد فني في ناس مختفوش وملبسوش الحجاب معملهوش، أنا عملت ألبومين و6 فيديو كليب، و12 أغنية سينجل، مفيش حد من بنات جيلي عمل ده تقريبًا.

وأشارت إلى أن، الوسط الفني بيتقبل الممثلة المحجبة عن المغنية شوية، لأن في بعض الموروثات الفكرية في مجتمعنا العربية مبتقبلش ست تكون بحجاب وتغني، يمكن في آخر 4 سنين شوفنا نداء شرارة وهلا رشدي، وفي وقتي الناس مكنتش متقبلة ده أوي.

واختتمت شاهيناز حديثها قائلة: مقدرش أحكم على بني آدم هو شايف الدنيا من منظور إيه، هو شايف حاجة ممكن أنا مكونش شايفاها، وكل واحد بيختار الأنسب لحياته، وربنا خلقنا عندنا إرادة وعقل والبني آدم خطاء ممكن آخذ قرار وارجع بكره أندم عليه.

المؤلفة شاهيناز عبد الرازق: فيلم خلف الكواليس كان تحديا كبيرا بالنسبة لي

شاهيناز: المساكنة نوع من أنواع الزنا وإعلامية لغت حلقتها معايا عشان معنديش فضيحة

ويعد برنامج المنسي، من تقديم الإعلامية إنجي هشام على شاشة قنا هي، ويُعرض يومي السبت والأحد من كل أسبوع في تمام الساعة الحادية عشر مساءا، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.